Era Casa deth Senhor (1820-2020)
Era Casa deth Senhor se trape situada en carrèr Major deth pòble d’Arròs. Aguest apertanh des de temps antics ath tèrme municipau d'Arròs e Vila, que siguec annexat eth 1970 ath de Vielha e Mijaran.
Era union de dus familhes es Subirà deth Senhor d’Arròs e es Ademà des de Tròi d’Arró la vedèc néisher en un entorn de poder e riquesa. Non ère casualitat aguesta union. Es dues familhes, segurament emparentades, auien compartit era alternança der ofici de baile dera Bailia Generau des terçons de Lairissa e de Bossòst. Un ofici que passaue de pairs a hilhs.
Quan ena familha Subirà d’Arròs era ereua ei ua hemna, Maria Antònia Subirà Ademà, non estone que se maride damb un hilh des Ademà d’Arró.
E des d’Arró arribe er òme, Francisco Ademà Subirà, que transformarà er auviatge des Subirà e eth paisatge urban d’Arròs. Mès eth madeish contribuirà ara decadéncia e desaparicion d’aguest patrimòni en miei des istòries e des legendes.