Era Casa deth Senhor d’Arròs se comence a projectar a compdar de 1811, data a on se registre era crompa de terrens, e es sues òbres acaben en 1820.
En projècte e construccion dera casa i participèc un o mès arquitèctes, un d’eri segurament francés. Aguesti professionaus hèren arribar er estil Neoclassic, de mòda en moment de bastiment der edifici
Es trabalhs de husteria sigueren segurament dessenhats per mèstres ebenistes coneishedors des estils de mòda dera epòca. Era escala e es pòrtes, es encubèrtaments des larèrs e es mòbles des crambes presenten dessenhs que rebremben ath subestil Loís XVI deth Neoclassic.
Ua des petites crambes dera prumèra planta, segurament abilitada coma petit salonet, siguec ricament guarnida damb ua des panoramiques titolada “Es Ribes deth Bosfòr” de Joseph Dufour, ua pèça originau anterior a 1812. Ua decoracion pròpria des salons des familhes burgeses de França.
Sabem dera existéncia d’aguesta panoramica pes scènes dera pellicula “Aquella joven de blanco” de 1965 e pes imatges deth fotograf Joaquim Castells en 1981 e pes fotografies der arquitècte Carlos Llobet e Roviras de 1995 .
Es òbres de reabilitacion dera Casa deth Senhor heren a desaparéisher es rèstes d’aguesta panoramica, qu’encara se conservaue en 1995.